Lo projècte de l'escòla
Ua escòla associativa e laïca, devath contracte dab l'Estat. Que s'i ensenha en bearnés de la vath d'Aussau. Los mainats que cercan, que cooperan e que decidan.
L'immersion en practica
A la Calandreta, lo bearnés n'ei pas ua matèria de mei : qu'ei la lenga de la classa. Que's compta, que's legeish e que's canta en bearnés. La lenga qu'ei a l'encòp l'utís e l'objècte de l'aprentissatge.
Lo francés qu'arriba chic a chic a partir de la fin deu CP. A la fin de l'escòla elementària, los mainats que legeishen, qu'escriven e que parlan las duas lengas. Los programas que son los de l'Educacion nacionala.
Las familhas n'an pas besonh de parlar bearnés. La màger part deus parents ne'n parlavan pas abans d'arribar. Quauques uns que l'aprenen au medish temps que lo son mainat.
Duas lengas, un sol cervèth
Apréner d'òra dens duas lengas que hè trabalhar l'atencion e la memòria. Lo mainat que s'acostuma a passar d'un sistèma a l'aute e a causir los sons mots. Aquera soplesa que'u servirà entà totas las lengas qui encontrarà.
La paur mei correnta de las familhas qu'ei la confusion enter las lengas. N'i a pas nada rason. Los mainats que destrian las soas lengas plan d'òra e que saben a qui parlar dens quina. Lo francés, qui ei pertot a l'entorn, n'ei pas jamei en dangèr.
Pedagogias activas e institucionalas
L'escòla que s'inspira de las pedagogias Freinet e de la pedagogia institucionala. Que s'apren en har, puish que's bota mots sus çò qui ei estat hèit. Quate principis que tornan cada dia.
L'autonomia
Cadun que sap çò qui a de har. Qu'a lo son plan de trabalh e qu'avança au son ritme.
La cooperacion
Que s'ajudan enter atges diferents. Lo mei gran qu'explica, e en explicant, qu'apren.
Lo conselh
Las règlas de la classa, los projèctes e los conflictes que's discuteishen au conselh. Las decisions que's prenen amassa e que valen entà tots, adultes tanben.
L'experiéncia
La vita de cada dia — lo minjar, l'òrt, ua sortida, ua correspondéncia — que vien la matèria deus aprentissatges.
Avalorar shens classar
Los progrès que's segueishen per colors. Que disen on ei lo mainat dens un aprentissatge : çò qui ei aquerit, çò qui's basteish encara. Lo mainat que legeish eth medish lo son camin e que's compara ad eth, pas aus autes.
Laïca, obèrta
La Calandreta qu'ei ua escòla associativa e laïca, devath contracte dab l'Estat. Los regents que son pagats per l'Educacion nacionala. Ua petita participacion financèra qu'ei demandada a las familhas entà ajudar a pagar lo salari de l'ajuda mairala. L'associacion que paga tanben lo material pedagogic e los autes salaris deu personau d'apui dab las cotizacions, las hèstas e las vendas de sostien.
Las familhas ne son pas clientas : que hèn partida de l'escòla. Qu'i a ua amassada generala, que's decida amassa, que's balha la man.
Ua lenga qui n'ei pas un sovenir
Lo bearnés qui parlan los mainats qu'ei lo de la vath d'Aussau : lo deus vesins, deus cants, deus condes e de las hèstas. L'escòla que hè víver aquera cultura uei, en cantar, en jogar, en encontrar los qui la parlan encara cada dia.
Enveja de véder tot aquò de vertat ?
Ua visita que vau mei qu'ua pagina de site.