Sostenir l'escòla

L'Estat que paga los regents. Tot lo rèste — lo material pedagogic, los salaris de l'acuèlh deu matin e de la cosina — qu'ei pagat per l'associacion. Que vòu díser : per las familhas, los amics de l'escòla, e los qui crompan un bidon d'òli.

On va l'argent

Arren de misteriós : libes, papèr, pintura, material de classa, sortidas, e dus salaris que digun mei ne paga. Lo budget qu'ei presentat cada annada a l'amassada generala, davant las familhas qui l'an pagat.

Tres faiçons d'ajudar

Crompar a la botiga de sostien

L'escòla qu'organiza vendas amassadas : òli d'oliva bio en bidon de 5 litres, e autes productes segon las campanhas. Que's comanda en linha, que's paga, que's vien cercar la comanda a l'escòla. Çò qui rapòrta l'operacion que va tot a l'escòla.

Qu'ei benlèu la faiçon mei simpla d'ajudar : que crompatz quauqu'arren qui vos cau, a un prètz corrècte, e l'escòla que i ganha.

La botiga qu'ei obèrta

Lo catalògue de la venda en cors, los prètz e los oraris de retirada que son en linha. La comanda e lo pagament que's hèn sus lo site.

Anar a la botiga

Aderir a l'associacion

L'associacion qui pòrta l'escòla qu'ei obèrta mei enlà de las familhas : pairbons e mairbonas, ancians calandrons, vesins, amics de la lenga. Aderir, qu'ei sostenir dab sòus e aver votz a l'amassada generala.

Lo montant de la cotizacion qu'ei votat a l'amassada generala. Demandatz-nos-lo : que vos mandaram lo bulletin d'adesion.

Demandar a aderir

Balhar un chic de temps

Qu'ei çò qui manca lo mei. Ua escòla de vint mainats tenguda per benevòls que viu de petitas mans regularas mei que de grans gèstes.

Tiéner un estand a ua hèsta o a un mercat
Balhar la man a ua jornada d'obradors o d'òrt
Ajudar a preparar e a repartir ua venda de sostien
Acompanhar ua sortida escolara
Prestar un saber-har : comptabilitat, bricolatge, cordura, musica, informatica
Viéner parlar, cantar o condar en bearnés dab los mainats

Ne demoratz pas au ras ? Har conéisher l'escòla a l'entorn de vos qu'ajuda ja hèra.

Prepausar ua man

Que'n parlam

Ua question sus un don, ua venda, un partenariat ? Escrivetz a l'associacion, quauqu'un que vos respon.

Nos contactar